MAY 10, 2024
ROMMEL PLACENTE
DUMALO ang tinaguriang Diamond Star ng showbiz na si Maricel Soriano sa pagdinig na naganap sa Senado noong Martes ng umaga, Mayo 7, 2024. Nagtungo si Maricel sa Senate hearing sa imbitasyon ni Senator Ronald “Bato” Dela Rosa, chairman ng Senate Committee on Public Order and Dangerous Drugs. Ito ay para bigyang-linaw ang pagkakasangkot ng kanyang pangalan sa diumano’y PDEA (Philippine Drug Enforcement Agency) leaks na nag-uugnay sa pangalan nila ni Presidente Ferdinand Marcos Jr. sa paggamit ng ilegal na droga. Kasama ang pangalan ni Maricel sa mga diumano’y listahan ng mga personalidad na target ng drug operation sa isang condominium unit sa Rockwell, Makati City, noong Marso 2012. Pero ayon sa testimonya ni dating PDEA agent Jonathan Morales, hindi ito natuloy dahil namagitan si former Executive Secretary Paquito Ochoa ng Aquino administration. Sinabi ni Senador Bato kay Maricel, “Ma’am, okay lang sa yo, magtatanong ako sa yo, ha? Relax ka na? Ma’am, sa mga nag-viral na dokumento na nagdadamay sa pangalan mo, sa tingin mo ba may katotohanan ang mga nasabing dokumento?”
Sagot ni Maricel: “Unang-una po, hindi ko ho alam yung tungkol sa mga dokumento. Nalaman ko na lang yan nung ipinakita sa akin dahil hindi po ako nagbabasa ng mga ganyan. Wala po akong alam. “Next question ko po, ‘Ma’am. May property ka ba sa Rockwell? Ikaw ba ang nagmamay-ari ng [address] located at Rockwell, Barangay Poblacion, Makati City?” tanong ulit ni Sen. Bsto kay Maricel. Maricel: “Opo.” Dela Rosa: “Sa iyo yon, yung 46-C?” Maricel: “Hanggang 2012 po, nabenta ko ho yon. Wala na ako doon.” Pero dahil sa matagal nang panahon ang nakalipas, hindi na raw matandaan ng aktres ang buwan nang ibenta ang kanyang unit sa Rizal Tower. Tanong muli ni Sen. Bato kay Maricel, “Okay, but then you admit na you are the owner and at the same time, the occupant of such unit, yung unit 46-C?” Sagot ni Maricel, “Yes your honor.” Nang sabihin ni Sen. Bato na kailangan nito ng Deed of Sale ng condominium unit ni Maricel, “Opo at hahanapin ko po,” mabilis na sagot ng mahusay na aktres. Hindi natapos sa condominium unit na pag-aari ni Maricel ang tanong ni Dela Rosa dahil inungkat din nito ang isang isyung kinasangkutan ng aktres noong Hunyo 2011. Ito ay ang pagsasampa ng reklamo ng dalawa niyang kasambahay dahil sa pananakit sa kanila ng aktres. Konektado raw ito sa paggamit ng cocaine ni Maricel.
Pag-uusisa ng senador: “Ito rin, Ma’am, may napabalita in 2011, two former household workers who lodged a complaint of serious physical injury against Maricel Soriano stated that they decided to flee from the actress’ condominium unit also because of her alleged cocaine use. Ano po ang masasabi mo sa balita na ito?” Sagot ni Maricel: “Hindi po totoo yan.” Dela Rosa: “Hindi totoo? Thank you. I just want to get your answer to set the record straight. So, hindi totoo yon?” Maricel: “Hindi po.” Dela Rosa: “Pero totoo na meron kayong dalawang katulong sa bahay na dalawa na umalis?” Maricel: “Opo, kasi ninakawan po nila ako.” Dela Rosa: “Ninakawan ka nila? Totoo na binugbog mo sila o hindi?” Maricel: “Paano ko naman po bubugbugin, dalawa po sila?” Dela Rosa: “Okay. I am just confirming the news report po. Thank you, Ma’am, maraming salamat for your cooperation.” Para sa kaalaman ng publiko, nagkaayos na si Maricel at ang dalawang dati niyang kasambahay isang taon makalipas siyang sampahan ng reklamo ng mga ito. Ito ay matapos mapagtanto ng magkabilang partido na ang naganap na insidente ay isa lamang hindi pagkakaintindihan ng mga partido dahil sa bugso ng kani-kanilang damdamin.
After ng pagtatanong ni Sen. Bato kay Maricel, ipinaalala rito ni Senator Robin Padilla ang tungkol sa opisyal na pahayag ni Maricel na gusto nitong basahin. Pinagbigyan naman ni Dela Rosa ang kahilingan ng aktres. Ito ang kumpletong pahayag na binasa ni Maricel: “Magandang umaga po sa mga kagalang-galang na senador at sa lahat po ng nandito ngayong araw. “Ako po ay nakatanggap ng imbitasyon galing po kay Senator Bato Dela Rosa para magbigay ng komento tungkol sa isyung pinag-uusapan dito sa hearing. Unang-una, humihingi po ako ng paumanhin dahil hindi po ako sanay sa mga ganito. Alam ninyo po, first time ko lang talaga na makatanggap ng imbitasyon na humarap sa senado, nakakakaba at nakakatakot. Sa totoo lang po, hindi malinaw sa akin kung bakit po ako naimbitahan sa hearing. Nagtataka lang po ako dahil lahat po ng tumestigo dito ay nagsabing hindi na-verify ang impormasyon ni Mr. Morales at walang imbestigasyong naganap.
Pasensiya na po kung nalilito talaga ako dito. Gayunpaman, mataas po ang respeto ko sa senado at sa mga kagalang-galang na senador na nandito ngayon, lalo na po si Chairman Senator Dela Rosa. Sa abot po ng aking makakaya, tutulong ako na sagutin ang inyong mga katanungan pero, Sir, nakikiusap lang po ako sa inyo po, kung ang usapin ay tungkol sa mga bagay na may legal na implikasyon po, sana po ay pagbigyan ninyo ang aking abogado na sumagot para sa akin, hindi man po ako abogado, Sir. At sa usaping legal, mas nararapat po yata na ang abogado ko na lang po ang sumagot at magpaliwanag. Kung magkaroon naman ho ng legal question, pinahihintulutan ko po na magsalita para sa akin si Atty. Agnes Maranan. ‘Maraming salamat po.”
KAILA ESTRADA, KINAMUHIAN NG MADLANG PIPOL
KUHANG-KUHA ni Kaila Estrada ang pikon, galit, inis ng mga manonood ng serye nina Donny Pangilinan, Belle Mariano na Can’t Buy Me Love. Puring-puri nga ng mga fan ang husay niya sa pag-arte, at rason `yon para makaramdam ng galit sa kanya ang mga manonood, lalo na ang mga fan ng DonBelle. Umulan ng papuri sa Instagram wall ni Kaila, at lahat `yon ay nagsasabing ang husay-husay niya, na galit na galit sila sa karakter niya bilang Bettina. “Inis na inis kami sa’yo. Ang dami naming pinagbintangan, ikaw lang pala.” “Kuhang-kuha mo ang galit ko Kaila.” “The most unsuspecting suspect. I had a clue but I gave you the benefit of the doubt. What a plot twist.” “Hay naku Bettina, mag-ingat ka kapag nakasalubong kita.” “Grabe ang galing mong umarte Kaila. Kuhang-kuha mo ang pikon ko, ha! Ang galing mo, buwisit ka.” “Muntik kong mabato ang speaker sa harap ko dahil sa iyo, Kaila.” “Pang-best actress ka talaga, kuhang-kuha mo ang galit, inis ng lahat.” “Grabe ang acting, superb talaga.” “Sarap sabunutan ng bangs ni Kaila, ha!” “The villain we all stan.” Anyway, ang role nga niya bilang si Bettina sa Can’t Buy Me Love ang tinutukoy ng lahat, na rason kung bakit namatay ang nanay ng karakter ni Belle sa serye..
@HachikoThePoochInugami